Monforte de Lemos, 10 de marzo de 2025. Dentro da programación da Rede Galega de Teatros e Auditorios, o Concello de Monforte programa para este xoves 13 de marzo ás 20:15 no Edificio Multiusos a posta en escena da obra para adultos As Alumnas, da compañía Culturactiva, obra escrita por Paula Carballeira, dirixida por Fina Calleja e interpretada por Mónica Caamaño e Anabell Gago.
A obra enmárcase dentro do programa de actos do 8M Día Internacional da Muller, organizado pola Concellería de Muller e Igualdade e o CIM, en colaboración coa Concellería de Cultura.
O prezo da entrada xeral para esta obra é de 5 euros e de 3 para desempregados, xubilados e estudantes.
Sinopse
As Alumnas trata sobre a figura da pedagoga galega María Barbeito e sobre como o franquismo significou un enorme retroceso na educación do Estado, especialmente para as mulleres. As dúas personaxes femininas representan dous casos concretos de mulleres no marco histórico anterior e posterior á Guerra Civil que percorren diferentes camiños e que nos levan a tocar as transformacións sociais do momento.
As Alumnas busca facer un exercicio de reapropiación da realidade colectiva e individual para reconstruír a memoria e espazos imaxinarios da nosa comunidade.
Elvira Fontao e Rosa Lires, antigas alumnas de María Barbeito, volven atoparse na data da morte da mestra, no ano 1970. Xa son mulleres. Atrás queda a infancia, o mundo que lles abriu a mestra antes de que o Comité de Depuración a afastase do seu traballo na escola. Porén, son as dúas únicas alumnas que lle escribiron cartas contándolle o que foi das súas vidas. A través desas cartas, e da reconstrución daqueles tempos nos que eran as mellores amigas, iremos descubrindo como as decisións marcan o destino de cadaquén, e o medo, e a rebeldía.
A educación, peza fundamental no desenvolvemento e na liberdade das persoas, especialmente das mulleres, é o eixo fundamental da obra. As dúas personaxes femininas representan dous casos concretos de mulleres no marco histórico anterior e posterior á Guerra Civil, que nos levan a tocar as transformacións sociais do momento.
A forma da peza parte desa pedagoxía que recolle María Barbeito de Maria Montessori ou Ovide Decroly: centros de interese, láminas ilustradas, a torre rosa, as imprentas infantís, os traballos de clase, os debuxos, a música, a observación da natureza, o coidado e o respecto polas necesidades de aprendizaxe de cada nena.
Un ano máis, aplicando as políticas de igualdade dun xeito transversal, a Concellería de Cultura de Monforte colabora coa Concellería de Muller e Igualdade, incluíndo na súa programación obras teatrais con perspectiva de xénero.
A seguinte obra do ciclo de teatro programada polo Equipo de Goberno do Concello de Monforte, será A nena e o grilo camiño das cores da compañía Magín Blanco, que terá lugar o domingo 16 de marzo ás 6 da tarde no Auditorio do Edificio Multiusos, con entrada gratuíta e irá dirixida a público infantil e familiar.
