Actualidade

O salón de actos da Casa da Cultura Poeta Lois Pereiro acollerá o sábado 30 de novembro unha representación teatral con entrada libre e gratuita. Representación que poñerá en escena o grupo monfortino de teatro TEATREIRAS. O Concello integrado nos Circuitos de Teatro Afeccionado e Profesional da Deputación Provincial de Lugo Vicepresidencia Cultura presenta o espectáculo que leva por título "OS OUTROS" .

Sinopse:
Unha casa moi antiga, habitada por varias pantasmas, que en vida tamén a habitaban (ou pasaban por alí cando lles chegou o final), acollerá novos habitantes, que por cousas do azar acaban de herdar tremendo casoplón. As novas inquilinas comezan a facer plans de convertila nun hotel, pero os intereses de cada un dos personaxes, dun lado e doutro, acabarán chocando e provocando unha chea de líos que só poderán ter un final: chegar a entendemento e convivir en armonía.

Autoría: Adaptación de varias tempadas da serie de televisión inglesa "Ghots".

Dirección: Francisca Abeledo.

Elenco: Mª Clarisa Mira, Pilar Cambón, Iago Fernández, Dorinda Veiga, Antía Quiroga, Sergio López, Sofía
Rodríguez, Anxo González, Noelia Pastor, Yas Iglesias, Marijo Abeledo, Gloria Guerrero, Rita Pumar, Nery
González, Iván Fernández, Alexandra Macineanu e Andrea Abeledo.

Teatreiras ten as súas orixes nas actividades de tempo libre para maiores, que se desenvolvían desde Servizos Sociais do Concello de Monforte. Como os obradoiros de teatro tiñan moito éxito, no 2020 constituíuse a Asociación de Teatro Monfortino, que cos anos derivaría en dous grupos de teatro, un deles Teatreiras, que desde os seus inicios ven sendo dirixido por Francisca Abeledo e polo que pasaron deceas de persoas de todas as idades. Cada ano preparan obra nova e ademais participan en representacións escolares, recitais poéticos, fan teatro de monicreques, contacontos e en xeral colaboran de forma moi activa na vida cultural de Monforte e arredores, sendo o seu proncipal sinal de identidade a interxeracionalidade.

Díptico informativo

O domingo 1 de decembro ás 18:00 h e no Edificio Multiusos terá lugar a terceira cita co teatro para público infantil e familiar dentro da programación da Rede de Teatros e Auditorios da Xunta de Galicia en Monforte de Lemos.

A compañía PÉREZ&FERNÁNDEZ presenta  NANAI DA CHINA, obra dirixida a un púbico infantil de máis de 5 anos, composta por Victoria Pérez, e Xabier Romero, dirixida por Victoria Pérez e coa interpretación de Victoria Pérez e Manu Fernández.

Nanai da China é unha nena que naceu unha noite sen lúa. Os seus veciños rexéitana dende que nace, por pura superstición. Ela só sabe dicir que non, e axudar ao seu avó a cultivar o arroz máis delicioso desta beira do Yangtsé en compañía de Chispúm, un simpático búfalo de auga. Para loitar contra a estúpida superstición da xente, Nanai e o seu avó elaboran un plan que⋯ non sae todo o tempo tan ben como debería⋯

Nanai da China é un espectáculo de teatro para público familiar onde os títeres e os actores se fusionan para representar este conto orixinal cheo de maxia, aventuras, e humor. A peza gañou o Premio María Casares 2024 na categoría de monicreques.

O prezo da entrada xeral para esta obra será de cinco euros e tres para nenos, desempregados, xubilados e estudantes.

O xoves 12 de decembro ás 20:15 h e no Edificio Multiusos terá lugar a quinta e última das representacións para adultos que a Delegación de Cultura do Concello de Monforte programa no segundo semestre de 2024 na nosa cidade, dentro das actividades da Rede Galega de Teatro e Auditorios da Axencia Galega das Industrias Culturais da Xunta de Galicia.

A compañía MALASOMBRA presenta TESTOSTERONA obra coa autoría de Sabina Berman, dirixida por Xoque Carbajal e cun elenco artístico conformado por Camila Bossa e Luis Iglesia. O director dun importante medio de comunicación debe deixar o seu posto en mans dun dos seus dous sub-directores. Un é muller, home o outro. Que influirá nesa decisión?: a capacidade?, o sexo?, a experiencia?, a audacia?, o engano?, a trampa?..

TESTOSTERONA fala de desigualdade laboral; un home e unha muller optan a un posto de máxima responsabilidade  nun medio de comunicación de ámbito nacional; cal dos dous será o elixido e por que?

A autora mexicana Sabina Bernan, proponnos unha reflexión profunda sobre a desigualdade laboral por cuestión de sexo, e faino de maneira que nos sorprenderemos cun sorriso debuxado nos nosos beizos vendo as peripecias destes personaxes. 

O prezo da entrada xeral para esta obra será de cinco euros e tres para desempregados, xubilados e estudantes.

O Concello de Monforte de Lemos integrado nos Circuitos de Teatro Afeccionado e Profesional da Deputación Provincial de Lugo Vicepresidencia Cultura presenta a obra COPACABANA do Grupo de Teatro monfortino VIRAVENTOS. O espectáculo terá lugar no salón de actos da Casa da Cultura Poeta Lois Pereiro o sábado 14 de decembro ás 20:00h con entrada libre e gratuíta.

Sinopse: estas son as andanzas dun grupo de amigos e amigas moi dispares, sen nada en común, pero aos que a vida xuntou para levar a cabo unha misión conxunta. Esta é unha comedia de enredos onde o público pode verse reflexado nalgún dos personaxes, chegando a comprender por que fan o que fan, por moi disparatado que sexa, empatizando con cada un deles. Trátase dunha legoría da vida, das gañas de vivir, da amizade, da diversión e, sobre todo, trátase dunha reflexión que nos leva a conclusión de que nunca é tarde para gozar da vida, de que xamais temos que darnos por vencidos e de que a unión fai a forza.

Autoría e dirección: Candela López e Marcos Vázquez

Elenco: Elena Arnaiz, Juan Castro, Pury Conde, Manuel Fuentes, Teresa González, Mari Pradera, Olli Rodríguez,
González Rodríguez, Josi Rodríguez e Marina Vidueira.

O Grupo de Teatro Viraventos, da comarca de Lemos, é un grupo amador formado por once persoas apaixoadas do teatro, que levan moito tempo desfrutando tando de velo como de facelo. Ano tras ano poñen moito interese na creación e na representación de obras, chegando a conformar unha "gran familia de teatreiros e teatreiras". O seu lema é que ser amador non é menos que ser profesional, simplemente é outra maneira de facer as cousas.

O Concello de Monforte integrado nos Circuitos de Teatro Afeccionado e Profesional da Deputación Provincial de Lugo Vicepresidencia Cultura organiza no salón de actos da Casa da Cultura Poeta Lois Pereiro unha representación teatral con entrada libre e gratuita para todos os públicos da compañía TEATRO DO MIOLO coa obra "SAÍNDO DO CERCO", a actividade será o mércores 18 de decembro ás 20:30h. O autor e director é Guillermo Cancelo e o seu elenco é Chelo Lamela, André Vázquez e Guillermo Cancelo.

Suso é un novo residente no centro de maiores. Pensa que por estar na última etapa da vida, esta non merece ser vivida. Amalia, unha compañeira de residencia, pode ser a peza que faga dar un xiro aos acontecementos, facendo que Suso atope o sentido da súa vida.

O salón de actos do Edificio Multiusos acollerá o xoves 26 de decembro ás 18:00h unha representación teatral con entrada libre e gratuita para público infantil e familiar da compañía TRÉCOLA PRODUCIÓNS.

O espectáculo leva por título "COA MÚSICA A OUTRA PARTE" . A autora e directora é Isa G. Coldeira e o elenco é Ero Vázquez Cabrera e Raquel López Cendán.

Coa música a outra parte é unha comedia de luva e música en directo. catro historias entrelazadas forman este enredo baseado en varias obras de Rafael Dieste ás que Trécola lle dá unha volta, engadindo escenas de colleita propia e actualizando o seu argumento con temáticas combativas e irreverentes, para darlles un toque divertido e provocador.

A representación forma parte do Circuíto de Teatro Profesional organizado pola Vicepresidencia da Deputación de Lugo no ano 2024.