Monforte de Lemos, 19 de febreiro de 2025. Como xesto simbólico e para conmemorar o Día Mundial do Colangiocarcinoma, o Alcalde de Monforte, José Tomé Roca, informa que mañá xoves día 20 de febreiro procederase á iluminación da Torre da Homenaxe de San Vicente de cor verde.
“Dende o Concello de Monforte, sumámonos a esta iniciativa e queremos facela extensiva a toda a cidadanía iluminando de verde a Torre da Homenaxe, para dar visibilidad e sensibilizar á sociedade sobre este tipo de cancro, o tumor das vías biliares máis frecuente, pero aínda pouco coñecido”, destaca o Alcalde.
Así, o Concello súmase a esta campaña promovida pola Asociación de Tumores de Vías Biliares (ATUVIBI), para concienciar sobre os tumores da vía biliar, e que conta co apoio duns 110 concellos e entidades.
Sobre o colangiocarcinoma e os tumores da vía biliar
Segundo datos de ATUVIBI, o colangiocarcinoma é un tipo de cancro que en España representa só o 1% dos casos oncolóxicos. A nivel mundial o colangiocarcinoma diagnostícase en 2 de cada 100.000 persoas ao ano, polo que é considerado un cancro raro.
A pesar diso, nos últimos anos detectouse un aumento da incidencia no colangiocarcinoma intrahepático, que xa é o segundo cancro de fígado máis diagnosticado, por detrás do hepatocarcinoma.
Nunha gran maioría dos casos, o diagnóstico deste cancro realízase en etapas avanzadas debido á falta de síntomas específicos, o que dificulta as posibilidades de tratamento efectivo.
Como conclúe a European Network for the Study of Colangiocarcinoma (ENS-CCA) no seu informe “Panorama do colangiocarcinoma en Europa” (2022), o estudo observacional internacional máis grande que se realizou ata a data cunha mostra que incluíu a 2.234 pacientes de 26 hospitais e 11 países de Europa, “o colangiocarcinoma diagnostícase con frecuencia nunha etapa avanzada, unha proporción de pacientes non recibe terapias específicas contra o cancro e o prognóstico segue sendo desalentador. É necesario identificar os factores de risco prevenibles e implementar a vixilancia nas poboacións de alto risco para reducir a mortalidade relacionada co cancro”.
Neste sentido, segundo constata o informe "As cifras do cancro en España 2025" publicado recentemente pola Sociedade Española de Oncoloxía Médica (SEOM), a taxa de supervivencia a cinco anos dos tumores de vías biliares sitúase ao redor do 20%, dependendo da localización e o estadio do tumor no momento do diagnóstico.
Por todo iso, a campaña “Ilumina en verde” busca concienciar á sociedade e dar visibilidade aos pacientes que sofren esta complexa enfermidade mobilizando a cidadáns, institucións e organización.