Monforte de Lemos, 14 de xuño de 2024. O Alcalde de Monforte informa da apertura do prazo de matrícula para os Cursos de Verán de Música e Danza que se organizan no Conservatorio de Música Municipal “Mestre Ibáñez”, e que é dende o mércores 12 de xuño e ata o 22 de agosto.
Ó igual que nas pasadas edicións, os cursos vanse desenvolver en diversas semanas tanto no mes de xullo coma no de agosto, algo que en anteriores anos so se celebraba no mes de agosto. Neste senso, o Alcalde, José Tomé Roca, sinala que “dende o Equipo de Goberno do Concello decidimos manter a celebración destes cursos nos meses de xullo e de agosto, motivados polas necesidades de conciliación familiar dos monfortinos e monfortinas así como para que nenos e nenas poidan disfrutar dunhas vacacións activas practicando, como é neste caso, actividades tanto lúdicas coma formativas relacionadas coa danza e a música”.
Matrícula nos Cursos de verán de danza e música en Monforte
O prezo dos cursos de verán de danza e música, que se desenvolverán no Conservatorio Municipal “Mestre Ibañez” será, para todos os casos, de 25 euros, e neste prezo inclúese que os alumnos e alumnas poderán elixir ata un máximo de dúas materias, de música, danza ou ambas. Do mesmo xeito, poderán participar en máis materias cubrindo outra solicitude. O nivel das diferentes materias será de iniciación ou avanzado. Cada materia terá unha duración dunha hora que se elixirá no momento da inscrición
O prazo de inscrición abre dende o 12 de xuño ao 22 de agosto de 2024, sempre previo ás datas específicas de celebración dos distintos cursos.
A inscrición realizarase na ventanilla da oficina de Rexistro do Concello de Monforte en horario de mañá, aportando a solicitude debidamente cuberta e reservando no momento da inscrición a praza concreta co seu horario específico e en rigorosa orde de chegada.
No caso de realizar a inscrición na sede Sede Electrónica (monfortedelemos.es) :
1º Asignarase a data específica do curso á espera de confirmación da praza e horario por parte do Concello.
2º Despois da confirmación da praza, enviarase o extracto da taxa debidamente pagada por autoliquidación ao correo: cursos.musicaedanza@concellodemonforte.com
As MATERIAS DE MÚSICA estarán dirixidas a alumnos e alumnas a partir de 6 anos de idade e constará de obradoiros de práctica instrumental de especialidades como, guitarra, violín, piano, saxofón, clarinete, frauta doce, frauta travesa, trompeta, trombón, gaita, percusión moderna (batería) e percusión tradicional galega (pandeireta, pandeiro, tambor..).
En piano será preciso traer auriculares, así como un xogo de pinturas nos alumnos e alumnas de ata 9 anos.
En percusión moderna será preciso que o alumno aporte un par de baquetas modelo 5A e unha pelota de tenis.
Polo que respecta á DANZA, estará dirixida tanto a nenos e nenas como a xoves en xeral a partir de 6 anos. Formaranse distintos obradoiros por idades en danza tradicional galega, moderna e clásica.
MATERIAS, DATAS DE CELEBRACIÓN E PRAZAS DISPOÑIBLES
MÚSICA:
Violín: a partir de 6 anos, celebrarase os días 15 a 19 de xullo e contará con 9 prazas.
*Piano 1º grupo: a partir de 6 anos, celebrarase do 1 ó 5 de xullo e contará con 9 prazas.
*Piano 2º grupo: a partir de 6 anos, celebrarase do 29 de xullo ó 2 de agosto e contará con 9 prazas.
*Piano 3º grupo: a partir de 6 anos, celebrarase do 5 ó 9 de agosto e contará con 9 prazas.
*Piano 4º grupo: a partir de 6 anos, celebrarase do 26 ó 30 de agosto e contará con 9 prazas.
Guitarra: a partir de 6 anos, celebrarase do 1 ó 5 de xullo e contará con 10 prazas.
Saxofón: a partir de 6 anos, celebrarase do 1 ó 5 de xullo e contará con 6 prazas
Clarinete: a partir de 6 anos, celebrarase do 5 ó 9 de agosto e disporá de 6 prazas.
Frauta doce e travesa: a partir de 6 anos, celebrarase do 5 ó 9 de agosto e contará con 6 prazas.
Vento metal, Trombón, Trompeta: a partir de 6 anos, celebrarase do 5 ó 9 de agosto e disporá de 6 prazas.
**Percusión moderna: a partir de 6 anos, celebrarase do 26 ao 30 de agosto, e disporá de 10 prazas.
Linguaxe Musical 1º grupo: a partir de 6 anos, terá lugar do 1 ó 5 de xullo, e contará con 5 prazas.
Linguaxe Musical 2º grupo: a partir de 6 anos, celebrarase do 29 de xullo ó 2 de agosto e contará con 5 prazas.
Linguaxe Musical 3º grupo: a partir de 6 anos, terá lugar do 5 ó 9 de agosto e contará con 5 prazas.
Linguaxe Musical 4º grupo: a partir de 6 anos, celebrarase do 26 ó 30 de agosto, con 5 prazas.
*En piano será preciso aportar auriculares, así como un xogo de pinturas nos alumnos/as ata 9 anos.
**En percusión moderna será preciso que o alumno aporte un par de baquetas modelo 5A e unha pelota de tenis.
DANZA:
Para as materias de danza tradicional e moderna será preciso que os alumnos e alumnas traian as súas propias zapatillas deportivas e en ballet clásico, zapatillas de media punta.
*Danza tradicional galega 1: de 6 a 9 anos, terá lugar do 5 ó 9 de agosto, con 8 prazas.
*Danza tradicional galega 2: a partir de 10 anos, terá lugar do 5 ó 9 de agosto, con 8 prazas.
*Danza moderna: de 6 a 9 anos, terá lugar do 19 ó 23 de agosto, con 12 prazas.
*Danza moderna: a partir de 10 anos, terá lugar do 19 ó 23 de agosto, con 12 prazas.
**Ballet clásico: a partir de 6 anos, terá lugar do 19 ao 23 de agosto, con 12 prazas.
*Para danza tradicional e moderna será preciso traer zapatillas deportivas.
**En ballet clásico serán precisas zapatillas de media punta.
DESCARGA DE FORMULARIOS:
Formulario Solicitude Matrícula Cursos de Verán Conservatorio Monforte 2024
Formulario Autoliquidación Cursos de Verán Conservatorio Monforte 2024