-José Tomé presentou “dous dos elementos esenciais de promoción para a Feira Medieval, como son o cartel e o vídeo oficiais desta 21ª edición, que celebraremos o sábado e domingo de Semana Santa, é dicir, o 19 e 20 de abril de 2025”.
-O Alcalde anunciou o desenvolvemento dunha campaña de promoción, que se apoiará no vídeo e cartel oficiais, “e que será igual de intensa que a que fixemos en pasados anos para que a xente poida incluír a Feira Medieval de Monforte dentro da súa programación de descanso e de ocio nas vacacións de Semana Santa”.
-“Con esta edición número 21, continuamos a celebrar un dos maiores eventos da nosa cidade a nivel cultural e comercial, xa que a Feira Medieval, é un dos eventos máis destacados do noso calendario anual e representa un importante atractivo turístico que axuda a atraer miles de visitantes a Monforte e ó conxunto da Ribeira Sacra.”.
-O cartel da XXI edición da Feira Medieval conxuga dous elementos esenciais, a noite e as figuras misteriosas, que cada ano percorren as rúas de Monforte durante os dous días da Feira, enchendo de música ó seu paso, os lugares polos que desfilan. Tal e como dixo T omé, “Quixemos buscar unha imaxen potente, con forza, que transmita a variedade de espectáculos sorprendentes que os visitantes que veñan a Monforte poderán desfrutar. Unha imaxen que poida transmitir certa dosis de misterio e de sorpresa, que son dúas sensacións que os visitantes á Feira nos dicen que viven, sobre todo cando é a primeira vez que veñen, sen faltar a música que é un elemento esencial tamén dos espectáculos de rúa que se preparan para eses días. Este ano-proseguiu a explicar o Alcalde- decidimos escoller una imaxe real da propia Feira do ano 2024, adaptada á de Cartel, porque pensamos que a nosa Feira Medieval, ten empaque suficiente para promocionarse por sí mesma, e posiblemente, será algo que sigamos facendo nos próximos anos”
-O vídeo é unha recompilación de imaxes do ano pasado, do 2024, unidas polo fío condutor dunha música heroica e intensa. Ademais, recolle os eixos centrais protagonistas da Feira: os espectáculos de cetrería, o Mercado medieval que medra cada ano, o Campamento medieval, as Xustas e o Gran Torneo medieval, o Campamento infantil, os espectáculos de luz e son no Palacio Condal ou na Praza do Campo de San Antonio, ou a solta de faroliños dende a praza Luis de Góngora.
Monforte de Lemos, 31 de marzo de 2025. O Alcalde de Monforte, José Tomé Roca, deu a coñecer hoxe a campaña promocional da vinteunha edición da Feira Medieval de Monforte, un evento que se celebrará os vindeiros 19 e 20 de abril de 2025.
En concreto, a campaña apoiarase en dous elementos fundamentais, como son o cartel e o vídeo oficiais, dos que o rexedor monfortino deu a coñecer hoxe os seus deseños. Durante a roda de prensa o rexedor estivo acompañado pola primeira Tenente de Alcalde, Gloria Prada, e o Concelleiro de Medio Ambiente, Medio Rural e servizos.
Con estes dous elementos, o Alcalde anunciou o desenvolvemento dunha campaña de promoción “igual de intensa que a que fixemos nos pasados anos, para que a xente poida incluír a Feira Medieval dentro da súa programación de descanso e de ocio nas vacacións de Semana Santa, campaña que se sustentará nos dous elementos antes mencionados.
Na presentación o Alcalde fixo énfase en que “por fin chegamos ós 21 anos de Feira Medieval de xeito ininterrompido, e a pesar de non ter aínda comunicación de si será recoñecida como Feira de Interese Turístico Galego, o Equipo de Goberno mantén intactas as ilusións e esperanza de que asi sexa e de que pronto podamos celebrar este recoñecemento tan merecido.”
Neste senso, José Tomé incidiu en que “é de xustiza que a Xunta de Galicia nos outorgue un recoñecemento, coma Feira de Interese Turístico Galego, que creemos que xa hai anos nos tiña que ter recoñecido”, porque “a Feira Medieval de Monforte é un dos maiores eventos da nosa cidade a nivel cultural e comercial, é un dos eventos máis destacados do noso calendario anual, xa que representa un importante atractivo turístico e axuda a atraer miles de visitantes a Monforte e ó conxunto da Ribeira Sacra”.
Cartel oficial
O cartel da XXI edición da Feira Medieval, “foi escollido entre diversos bocetos, porque conxuga varios elementos que para nós son claramente centrais da nosa feira” explicou o Alcalde. “O ano pasado tomou protagonismo unha figura guerreira feminina que transmitía forza e valentía. Este ano, tamén buscamos unha imaxe que transmitira forza e sorpresa, ó mesmo tempo queríamos que aparecera algún elemento alusivo á música, que é esencial nos espectáculos de animación das rúas e como resultado, temos unha imaxe moi potente que transmite a posibilidade de vivir unha experiencia distinta e única para todos os visitantes que se animen a desfrutar da Feira Medieval de Monforte, por iso escollemos unha imaxe real da propia Feira do ano 2024, e adaptámola a cartel, porque pensamos que a nosa Feira Medieval ten empaque suficiente para promocionarse por si mesma”.
Vídeo recopilatorio
O segundo elemento presentado polo Alcalde, foi o vídeo promocional para este ano 2025. “A nosa proposta audiovisual”, explicou o Alcalde, está configurada a través dunha música heroica, intensa e que vai “in crescendo”, acompañando e sendo o fío condutor desas imaxes que, a modo de recompilación, son tamén un resumo dos eventos máis destacados da Feira Medieval do ano pasado, do 2024”.
Deste xeito, o vídeo recolle o que son os eixos centrais protagonistas da Feira, que nos permiten, tal e como destaca o vídeo “un reencontro coa época medieval de Monforte de Lemos”: os espectáculos de cetrería, o Mercado medieval con 140 postos este ano, o Campamento medieval, as Xustas e o Gran Torneo medieval, o Campamento infantil, os espectáculos de luz e son no Palacio Condal ou na Praza do Campo de San Antonio, ou a solta de faroliños dende a praza Luis de Góngora.
Este vídeo será proxectado no MUPI do Cardenal, no Mercado para a Medieval, e nas pantallas que se ubicarán durante a celebración da Feira en San Vicente e na Praza de España.
Unha versión máis reducida do vídeo, de algo mais de 2 minutos, será a que se faga circular polas nosas redes sociais e na páxina web do Concello, para acadar a máxima difusión posible deste evento.
Os vídeos pódense ver en:
-Vídeo oficial: https://youtu.be/_azG_jOBEjI
-Vídeo oficial (versión extendida): https://youtu.be/kLumn9oNT2c
Promoción intensa da Feira Medieval
Na súa intervención, o Alcalde tamén explicou que “con estes dous elementos que damos a coñecer hoxe, queremos facer unha campaña igual de intensa que a que fixemos nos pasados anos, para que a xente poida incluír a Feira Medieval dentro da súa programación de descanso e de ocio nas vacacións de Semana Santa, para que escollan vir a Monforte.”
A campaña de promoción da Feira incluirá tamén insercións publicitarias tanto nos medios locais como provinciais e autonómicos, xornais e radiofónicos.
Por outra parte, realizarase un reparto do cartel en todos os establecementos comerciais da cidade, e tamén por toda a comarca e nas principais cidades de Galicia.
Ademais, como todos os anos, colocarase o cartel durante a Feira do Viño de Sober, por ser un dos eventos que teñen unha afluencia importante de visitantes e polo tanto, ten unha potencial axuda á hora de acadar unha maior difusión.
“Creo que o traballo de promoción que facemos ano a ano desta Feira é bo, e proba delo son as solicitudes rexistradas para a instalación de postos de venta de produtos, o que supón un número moi alto en relación con outros eventos doutras cidades”, resaltou o rexedor monfortino. ” -Esta alta demanda proba que a Feira Medieval de Monforte é un evento exitoso e consolidado, que é un referente dentro do calendario de eventos de Galicia, porque son moitos os artesáns e comerciantes que queren participar nela”.
Presentación do programa oficial durante o Mercado para a Medieval
O terceiro elemento de promoción da Feira Medieval será o Programa Oficial, que será dado a coñecer durante a inauguración do Mercado para a Medieval, en rolda de prensa que terá lugar o sábado 5 de abril ás 11:30 horas na Praza de Abastos, “mercado co que queremos animar ás ventas relacionadas con produtos relacionados coa Feira Medieval”.
Neste mercado o visitante atopará unha gran variedade de postos adicados á venda de traxes medievais confeccionados a man para adultos e nenos, bixutería, complementos, un salón de peiteado e maquillaxe, ideas para a decoración de establecementos de hostalería….é dicir, todo o necesario para poder lucir o “máis medievo posible” nesta nova edición da Feira Medieval.
O Alcalde concluíu a súa intervención destacando que, “Monforte revive por 21ª ocasión o esplendor medieval do seu pasado”, unha cita imprescindible en Galicia, á que agardamos que, como nas últimas edicións acudan miles de visitantes, e que contemos tamén coa colaboración e implicación dos nosos veciños, e da nosa hostalería e do noso comercio”.