Monforte de Lemos, 12 de novembro de 2019. Na xornada de onte, o Centro do Viño de Monforte acolleu a presentación oficial do reto ó que se enfronta o piloto de motos, o monfortino Eduardo Iglesias, que en xaneiro de 2020 participará no rally Dakar, sendo así o primeiro piloto monfortino en facelo.
Na presentación, na que estivo acompañado polo alcalde da cidade e presidente da Deputación de Lugo, José Tomé Roca, non faltaron veciños, amigos, familiares, medios de comunicación e autoridades que acudiron arroupalo e darlle folgos ante este importante reto, que transcorrerá polos desertos de Arabia Saudí.
O rexedor municipal, ademais de manifestarlle todo o apoio da cidadanía, destacou o apoio económico que tanto dende o Concello como da Deputación se lle proporcionou ó piloto monfortino, fundamental, en verbas do propio Eduardo Iglesias, para “decidirme a dar o paso e anotarme un rally no que dende neno soñei sempre con participar”. Deste xeito, Iglesias agradeceu en varias ocasións tanto o apoio institucional, como dos patrocinadores privados cos que conta o seu proxecto, así como o apoio, fundamental, de familiares e amigos. 70.000 euros é o orzamento final destinado a culminar este reto.
O Alcalde manifestoulle o seu orgullo “por representar por primeira vez a Monforte e á Ribeira Sacra nun evento deportivo que xenera un enorme seguimento e unha repercusión mundial”.
O reto do rally máis famoso do mundo
Logo de moitas xestións administrativas e de requirimentos técnicos sobre a moto que finalmente levará ó Dakar, o piloto monfortino xa está inscrito para esta esixente proba, cuxa próxima edición celebrarase en Arabia Saudita do 5 ao 18 de xaneiro de 2020.
Iglesias salientou que correrá co único equipo galego que finalmente se inscribiu na proba, o “Galimplant”, no que ademais de coa moto de Iglesias, tamén participará cun boogie conducido por Pedro Burgo e Vallejo.
"Levo dous anos de preparación, pero ou Dakar é unha proba á que nunca se vai ao cen por cen. Estar na saída é un gran éxito, ou seguinte paso será rematar, con iso me conformo. E o ano que ven xa se verá", indicou o corredor.
Á cita Eduardo Igrexas acude logo de adestrarse intensamente nas areas de Marrocos, participando en abril na “Morocco Desert Challenge” e voltando a adestrarse en novembro. Deste xeito, ten ultimada a que será a súa moto no Dakar, unha KTM 450 rally de 400 CC coa que percorrerá un circuíto de 8.000 quilómetros dividido en 12 etapas (a proba divídese en dúas partes de seis etapas cada unha separadas por un día de descanso), e que terá lugar no deserto saudí do 5 ó 18 de xaneiro de 2020.
Iglesias correrá co dorsal 154, “o cal espero que me dea moita sorte, porque o 4 é un número que uso moito e o 54 foron os dous últimos números nos que rematou o Gordo da Lotería do Neno que tocou en Monforte en 2016”.