Monforte de Lemos, 27 de marzo de 2019. A Concellería de Igualdade de Monforte a través do Centro de Información á Muller (CIM), pechando o programa de actividades que organizou este ano co gallo do 8 de marzo “Día Internacional da Muller”, vai realizar un Obradoiro titulado “LIÑAS ENCARNADAS. Educación emocional con cabalos”, dirixido a un grupo pechado de 10 mulleres usuarias do CIM.
O mesmo será impartido nas instalacións Rincón de Finca El Carmen e desenvolverase ao longo dos meses de marzo, abril, maio e xuño, todos mércores de 10.00 a 13.00 cunha periodicidade quincenal. O primeiro deles tivo lugar hoxe nas citadas instalacións.
Con esta actividade preténdese que as participantes adquiran habilidades e competencias para identificar e regular as súas emocións e as dos demais, mellorando así o seu benestar persoal e social e o empoderamento persoal e relacional da muller. Trátase de contribuír a construír o desenvolvemento integral da persoa, para que adquira autoestima, asertividade e se reforce a súa autonomía.
Este proxecto encádrase dentro da Convocatoria de Subvencións que a Vicepresidencia e Consellería de Presidencia, Administracións Públicas e Xustiza a través da Secretaría Xeral da Igualdade dirixe ás Entidades Locais da Comunidade Autónoma de Galicia para a Promoción da Igualdade con cargo ao Programa Operativo FSE Galicia 2014-2020 para o ano 2019.
