A concelleira de Facenda e primeira tenente de alcalde, Mª Xosé Vega, compareceu en rolda de prensa para falar da comunicación informativa que se está enviando ós veciños e veciñas de Monforte sobre a suba do Imposto de bens Inmobles (IBI).
Nesa carta indícase que os recibos do IBI do 2013, igual que sucedeu no 2012, repercuten unha suba moi importante, do 42,86%, suba que vén imposta por unha decisión do Goberno do Estado.
A intención do Goberno Municipal é explicar á veciñanza que este aumento non foi consultado nin negociado co Concello, institución que se veu obrigada a aplicar unha decisión unilateral do Goberno do Estado.
Na misiva sinálase que o Goberno de España, presidido por D. Mariano Rajoy Brey, aprobou o día 30 de decembro de 2011 o Real Decreto-Leí 20/2011, sobre "medidas urgentes en materia presupuestaria, tributaria y financiera para la corrección del déficit público". No artigo 8 do citado Real Decreto-Ley, sobre tipos de gravame do imposto sobre bens inmobles, establécese un tipo de gravame mínimo de 0,50 para 2012 e de 0,60 para 2013.
A carta do Goberno Municipal tamén explica que ningún grupo político da Corporación de Monforte tivo nada que ver directamente na suba do IBI, aínda que sexa o Concello quen cobra o recibo.
Finalmente, na comunicación infórmase que a Alcaldía aceptou unha proposta que fixo o Partido Socialista e acordou reducir o IBI do vindeiro ano 2014, baixando do 0,60 ata o 0,55, matizando que esta redución levarase a cabo “sempre que as directrices do Goberno Central permitan facer efectiva esta baixa do Imposto de Bens lnmobles”.
Vega Buján dixo que a cidadanía notara o incremento do IBI “de case o 43% en dous anos”, motivo polo que o Concello, co acordo plenario de tódolos grupos da Corporación, decidira adiantar o cobro deste imposto “coa intención de fraccionar o pago e aliviar na medida do posible o desembolso que representa para as familias”. A concelleira de Facenda sinalou que “o fraccionamento dos pagos debe facerse na mesma anualidade, véndonos obrigados a adiantar o cobro do IBI para poder cumprir con este precepto”.
Mª Xosé Vega acusou ó PP de utilizar o enfado da xente por este incremento no IBI “culpando ó Goberno Municipal e incluso ó PSOE da subida cando o único responsable da mesma foi o Sr. Rajóy”. Para Vega Buján “desde o entorno do PP fomentouse un discurso para culpabilizar ó alcalde e ó Sr. Tomé desta subida, discurso que culminou nas diferentes pintadas”.
A concelleira de Facenda dixo que o envío destas cartas informativas deriva dunha petición do PSOE ó alcalde para que explicase á cidadanía as verdadeiras causas da subida do IBI.
Vega Buján tamén falou do interese de Julia Rodríguez, unha vez que tivo que admitir a autoría do Goberno do PP nas subas do 2012 e do 2013, en imputar ó Goberno Municipal a responsabilidade nas posibles subidas do IBI a partir do ano 2013. A concelleira de Facenda dixo que no futuro “temos interese en baixar este tipo impositivo ó 0,55, pero atopámonos con que o 28 de xuño deste ano o Consello de Ministros aprobou un proxecto de lei polo que deben manterse os tipos impositivos actuáis durante os anos 2014 e 2015, co cal nos veríamos obrigados a manter o 0,60 actual”. Segundo comentou, a vontade do PP aprobarase no Parlamento, onde ten maioría absoluta, motivo polo que “estaremos obrigados a manter o mesmo tipo impositivo ou a revalorizar o valor dos inmobles”, algo que segundo a concelleira de Facenda “influe no IRPF, nas transmisións e nas herencias”.
Finalmente, Mª Xosé Vega destacou que o tipo impositivo do IBI en Monforte era moi baixo (do 0,42) antes da subida obrigatoria imposta por Rajoy, “mentres que concellos veciños gobernados polo PP xa tiñan tipos do 0,60”
